2012年4月6日 星期五

驚!潮品的危機。日本知名潮牌BAPE竟賣給香港I.T集團了...


點此看完整訊息:

I.T. 買入 A BATHING APE 的戰略意義(上)BAPE還 “潮” 嗎?

之前很多人爭論 I.T. 買入 NOWHERE 是好是壞.
究竟是好還是壞呢?
要作出分析, 我們要先了解 BAPE 的興衰.
[因為太長, 如果冇心睇, 可只睇最下的總結.]
 BAPE 的誕生
NOWHERE 是一個於裏原宿誕生的個人品牌. 原創者是 NIGO.
於日本, 裏原宿的 DESIGNER, 是潮流的指標.
最初, NIGO 創作的產品 (衫, 褲, 袋, 鞋) 比較普通但有款. (普通的意思是你著了用了也未必知道什麼牌子. 有款的意思是穿著後有型有款.)
之後, NIGO 創作了 A BATHING APE 的 logo 產品 (猿人頭). 這個 logo 便於日本潮流界急速流行起來. NOWHER 的成功, 我們可看成猿人頭的 logo 出現.
之後的極上流行產品有: 所有有猿人頭 logo 的衫褲鞋, 更上一層樓的 “猿迷彩” 產品, 以及頂峰的鯊魚頭 zip up.

香港食正條水

在這段期間, 香港潮流界剛剛由美牌轉為日牌. BAPE 便剛剛食正呢條水. 所有被譽為香港潮流指標的水貨舖, 大賺突賺, 食正呢個浪.
主力幾間出名的水貨舖, 由商場開至地舖. 高峰是 2006 年, 當時日元兌換是100 Yen 兌6.x港元. 一件 BAPE Tee來價 $3xx, 但所有水貨舖都賣 $780, 賺一倍.
當時所有有 bape logo 既 tee, 一定全部有 market. 水貨佬入貨, 可以合埋眼入, 見貨就掃. 潮人們一見個 print ok 就買, 絕不手軟. 而有些 limited edition, 更以天價炒價出售.
例如, 當時有報章訪問一名潮人, 他 20 歲左右, 是在髮型屋工作, 人工只有 $6000. 但他卻買了那件第一代鯊魚 zip up, 炒價是 $12000 (原價 $2000 左右).
最利害的是, 銅鑼灣有一間賣 PIZZA 的地舖小店, 店主是印巴藉人士 (識講流利既廣東話), 你一直走進去, 有一間 50 尺既房, 原來全是賣 BAPE 的. 可想像到, 當時對於 BAPE, 個 market 係幾瘋狂.

日本更瘋狂

日本比香港更利害, 每到星期六, 因為日本通常是星期六出新貨的, 原宿 BAPE 的門前, 一定有一條長龍. 所有國家的水貨佬, 炒家, 自用人士, 全都要分一杯羹, 因為這是穩賺的.
最重要係, 日本這些潮牌, 一定係玩限量既. 就算唔係 limited edition, 都是只有數十件. 基本上, 你在出新貨當日既下午去到, 已經賣光.
而且日本人很有原則, 一定唔會加推, 就算有錢都唔賺. 這就正正造成了 demand supply 的不平衡, 令到有人因而賺取額外利潤. 你想知 demand supply 有多不平衡? 如果你去過當時的 BAPE 裏原宿店 (現在已搬了), 正正對面已經開了一間水貨舖, 裡面的貨比 BAPE 還多, 所有特別版都有. 就算當日推出的新貨都可以在裡面找到, 價錢當然貴左啦.
當日推出的新貨, 在 BAPE 專門店沒有, 但在對面的小店竟然有. 這有多瘋狂.

BAPE 末落的開端

於 2007年, 香港開了第一間 BAPE 專門店.
所有水貨舖都嚴陣以待, 心想, 我們的財路會被打斷嗎?
2007年4 月1 日, 中環. 又是一條長龍.
當日下午, BAPE 全店, 賣剩只有幾件貨. 對, 是幾件 only!
於之後幾星期, BAPE 也沒有新貨. 全店差不多賣光!
全部賣光咁好賺? I.T. 咪發達? 咁仲唔推多d新貨? 賺盡 ma.
這不是會大大影響水貨舖嗎?
不是! 我們要用日本人的頭腦去思考.
他們就是要限量. 要重品牌, 而不是賺錢.
I.T. 大鑊了!
咁大間舖0係中環, 冇野賣, 所有 sales 企晒0係度冇野做, 仲唔係燒錢?
一如水貨舖所預料, 和日本的 BAPE 一樣, 最部限量.
“專門店都冇野賣, 我地使乜驚!”
潮人們到過 BAPE 幾次, 每次也空手而回, 當然冇癮, 最後也只有重回水貨舖既懷抱.
而水貨舖卻多了一條水路, 就係直接搵人排隊, 買晒所有香港既貨再轉賣. 又大賺一筆.
但暗地裏, BAPE 的末落卻正在開始.

BAPE 還潮嗎?

2009年開始, 日本的 BAPE 已經了無新意了. 所有 Tee 既 print 都是那幾個猿人 logo, 就是隻猿人在做不同動作, logo 不同顏色. 一係就鯊魚頭 zip up 變老虎頭 zip up, 再變熊貓頭 zip up, 再變金魚頭 zip up. 最後, 再在每一種 zip up 加迷彩.
創作已經技窮!
其實, 大家想一想, 一件 print tee, 可以玩成點? 每星期推幾個新 print, 咁多年, 仲有乜可以玩?
再想, 假如你係創辦人 NIGO, 如果你只需要花10秒, 將 logo 既顏色, 由啡色轉金色, 結果照樣賣光, 你還會花幾十小時去創作一些新意念嗎?
NIGO 已經被寵壞了.
2011年既今日, BAPE在香港已經不再潮了.

為何會認為 BAPE不再潮呢?

第一, 假如你是一名潮人, 穿一身 BAPE. 但發覺同你搭緊地鐵既阿叔, 身穿 BAPE Tee. 你還會穿嗎? BAPE 專門店已經不再是冇野賣了, 所以很多人可以買到, 而潮人絕不容許自己既獨一無二被人量化寬鬆.
第二, 據全港最大A字頭水貨店 sales 朋友既消息, 潮人 (以前見BAPE 即買) 都異口同聲說不買 BAPE 了.
第三, 之前所提到既天價鯊魚頭 zip up, 復刻再復刻, 現在竟然可以在香港專門店找到, 而且是原價. (有貨=已經沒人買)
第四, 潮流指標既水貨舖, 已經不再大量入 BAPE 的貨品. 只會少量入一些特別版貨品, 如鯊魚頭 zip up. 但鯊魚頭 zip up 竟然要減價出售, 平過 $2700 都冇人買. 之前 $12000 既神話已經破滅了.

BAPE 是失敗嗎?

不是!
唔潮唔代表失敗.
BAPE 在2007 年之後既發展方向, 是要面向世界.
普及和限量是敵人. 如果限量, 大眾買不到, 又怎能普及呢.
所以, BAPE 要出大量既貨, 全世界咁賣, 復刻再復刻, 但又不可再如以往一樣浮誇, 怕大眾不接受, 要做成一間高級貴價版既 GIODARNO.

總結

BAPE 已經不再潮了. 而且會慢慢衰落. 就如之前盛極一時的 Nike Air Jordan, New Balance, York, M. Duck, Polo, Timerland, doctor martin 一樣.
但是, 唔潮是否就玩完? 絕對不是. GIODARNO 都未做過潮流指標, 咪又係賺大錢.
BAPE 現在既位置, 只是不再是 “領先既潮流品牌”, 不過品牌還是很有價值的 (你睇下 BAPE Tee 仲賣緊 $600 就知啦). BAPE 既產品已不再是賣得瘋狂, 但仍是有很多人買. BAPE 既定位仍是走中上價路線.
現在, 潮流界 (潮童界) 已經去到另一層面, 就是以價錢來定潮流. 越貴, 越冇人買得起, 越是潮. 最貴的 mastermind japan, 一件 tee $5000, 之後的 visvim, 一件 shirt $4000. 而 BAPE 的一件 tee $600, 又怎可叫潮呢.
咁, I.T. 買入 BAPE, 是否想將 BAPE 回魂?
又是否想將 BAPE 打造成高級 GIODARNO, 再戰國際?.
我認為不是.
那麼, 為什麼 I.T. 會買入蝕錢中和衰落中的 BAPE?
下一篇是關於I.T. 買入 A BATHING APE 的真正戰略意義, 一定要看!
原文链接:http://www.snb.hk/blog/front/blogdetail.aspx?postid=46824&blogid=19442
 

Related Posts Plugin for WordPress, Blogger...